امــــــــــــــــــــــــــي............ والبحث عن الذات
Posted by احمد حسين | Labels: امي ، السادات ، البحث عن الذات ، مبارك ، الفساد ، العصر ، الكتاب ، كتب ، المواد التمونية ، الحكمة | في الأحد، 19 يوليو 2009 الساعة 6:43 ص
مش عارف ليه انا عاوز اكتب عن امي النهاردة ، هو صحيح انه النهاردة مش عيد الام و لا عيد ميلادها (بالاضافة الي اننا مش من هؤاة الاحتفال باعياد الميلاد و الكلام ده) بس انا صحيت و لقيت نفسي النهاردة بحبها موت وده شئ عادي بيحصل كل يوم بس النهاردة حسيت ان كمان عاوز اكتب عنها او ليها اي حاجة........مش عارف اكتب ايه!!! بس عاوز اكتب حاجة. يا تري انتوا كمان ساعات بتحسوا بكده و لا انا الدماغ عندي ضربت بدري شوية؟ مش عارف......بس امي ديه حكاية و موضوع كبير قوي قوي...... انا دايما الناس بتقوللي اني محظوظ، و انا عارف ايه اكتر حاجة انا ليا حظ كبير فيها ، ايه وصلت؟؟ امي طبعا ، امي ديه اكبر حظ ليا و انا لما بشوفها او بتكلم معاها بحس فعلا اني محظوظ. انا مش هعرف اقول اسباب ، بس اقدر اقول سبب و حكاية بتدل علي صحة السبب ده ،
و السبب هو ان امي ديه عندها عقلية متفتحة جدا جدا و سرعة بديهة من اسرع السرعات اللي شفتها (حاجة كده ١٠٠٠ جيجا و لا حاجة) بالرغم من انها لا تقرأ علشان هي مكملتش تعليمها و تقريبا لم تتعلم من اصله و ده لظروف عائلية شديدة الحساسية. عايزين تعرفوا االحكاية ؟؟ طيب اسمعوا :
من كام سنة كده (تقريبا سنه ٢٠٠٤) كانت امي مريضة شوية و دخلت ازورها في اوضتها فلقيتها نايمة فمردتشي اقلقها و قعدت اقرأ شوية في كتاب كان معايا. الكتاب ده كان اسمه “البحث عن الذات” طبعا تعرفه ، كتاب الرئيس محمد انور السادات. في الحقيقة انا سرحت شوية مع الكتاب بالرغم اني كنت قرأته عدة مرات ، بس مش عارف ليه انا بحب الكتاب ده! المهم انه بعد شوية كده صحيت امي و انا مش واخد بالي فسمعت صوتها اللي فوقني من سرحتي و هي بتسالني :
- أنت بتقرأ ايه؟؟
- كتاب.
- كتاب ايه؟؟ اسمه ايه و بتاع مين يعني؟؟
- كتاب البحث عن الذات ، للرئيس محمد انور السادات
- السادات.......آه......
سكتت شوية كده و بعدين قالت:
انت عارف الكتاب ده اتنشر في السنة اللي اتولدت انت فيها.......انت قلت اسمه ايه؟
- البحث عن الذات!
- ايوه....ايوه افتكرت.....بس عارف الناس كانت مسميه الكتاب ده ايه؟؟؟
- لا مش عارف.....ايه؟؟
- الناس كانت مسميه “البحث عن الزيت” مش الذات.......مهو في السنة ديه و الوقت ده الاسعار كلها ولعت و الناس كانت هتولع في البلد ، و السادات خاف و هرب علي اسوان.......ياه......ديه كانت ايام و لا ايام الحرب.
-علشان كده انت سمتيه البحث عن الزيت.
- لا يا ابني انا مسميتشي حد.....ده الناس هي اللي سميته البحث عن الزيت علشان المواد التمونية كلها اختفت من السوق و الناس بقيت بتدور علي الزيت و السكر و الدقيق و مش لاقية اي حاجة ، و بعدين جه السادات و نزل الكتاب بتاع الذات ده فبقي اسمه البحث عن الزيت.
- طيب يا تري يا امي لو الرئيس مبارك كتب كتاب و نزله السوق يا تري هيبقي اسمه ايه؟؟؟
- اسمه اللي ميتسماش!!!!....ههههههههههه
- لا بجد و النبي يا اماه
- طيب ده ممكن نسميه البحث عن الدواء........انت مش شايف كم الامراض اللي في البلد ، ممكن كمان نسميه “البحث عن التراب” مهو التراب ده ممكن يتاكل او تدفن نفسك فيه. وممكن تكبر دماغك خالص زي ما الجيل الجديد مبيقول و تسميه “ البحث عن اللابحث” و تريح الطاسة.
-..........................!!!!!!!!!!
صدقوني انا معرفتش اقول ايه بعد اللي قالته ده ، عرفتم ليه انا منبهر بيها ، علشان لخصت كل الموضوع في كلمتيين سهلين من غير متحذف اجابتين او تسآل الجمهور او تتصل بهيكل ، و دمتم يا حبايبي.
إرسال تعليق